కలువ నిరీక్షణ

ఎంత కాలమని వేచేను? ఎంత వఱకెదురు చూచేను?
పసి తనంపు ఆశలతో,సౌగంధపు బాసలతో.

వయసు నాది ముప్పది ఘడియలు వలపు తలపులింకి పోవు,
పెను తుపాను వచ్చినచో,పసితనము అశించి పోవు.
కలత లేని కొలను ఇల్లు కలక బారి ఛిద్రమాయె
ఎదురు చూచి,ఎదురు చూచి, ఎదను ఆశ సమసి పోయె.

రవి కిరణ సహస్రము నా అణువణువును కాల్చి వైచె,
ఏడి, ఏడి, ఏడి ఱేడు? కాన రాడు, కాన రాడు.
మబ్బు పొరలు విచ్చుకొని ఎద కలతను తీర్చి పోడు.